Гувоҳ (Джош Мак-Дауэлл) 6 bob

6-Боб - Гувоҳ. Ўзбек тилида Аудио китоб Онлайн

Инспектор Жан-Клод Годдар ўзининг эски икки эшикли “Рено” автомобилида ўтирар эди. Унинг машинаси кўплаб хизматдаги машиналар ва телекўрсатувлар ижодкорларининг (миллионлаб томошабинларга аллақачон шов-шувга тўла янгиликлар кўрсатиларди) машиналари орасида тиқилиб, тўхташ учун жой кутиб турарди. Ва ниҳоят Рэмзи биносининг олдида жой топиб тўхтади. Машина бардачоги‑
дан пистолетини ва инспекторлик жетонини олиб машинадан тушди. Ташқарида ноябрь ойининг совуқ кунлари эди.
Жан-Клод Годдар йигирма йил мобайнида Монакода детектив бўлиб ишлади, шундан сўнгги беш йил давомида у катта детектив лавозимини эгаллаб келмоқда.
Италия ва Франция ўртасида жойлашган Монте-Карло дунёдаги энг кичик мамлакатлардан бири (Ватикандан кейин иккинчи ўринда туради). Монте-Карло 2 кв. км. ортиқроқ қимматбаҳо пляж майдонига эга бўлиб, унинг 32 минг аҳолиси бор. Албатта, ўғирлик, жиноят ва бошқа муаммолардан холи эмас. Европанинг бошқа жойларига қараганда бу ерда жуда кўплаб миллионерлар бўлганлиги сабабли, бу шаҳар бойиб кетиш мақсадида юрган ҳасадгўйлар ва таъмагирлар диқ‑
қат-эътиборини ўзига жалб қилишининг ажабланарли жойи йўқ. Аммо миналар қўйилган машиналар-чи? Қотиллик‑
лар-чи? Булардан ташқари, бир кунда бир нечта жойда со‑
дир бўлаётган қасддан ўлдиришлар-чи? Бугунги кунга қа‑
дар бундай воқеаларни қулоқ эшитиб, кўз кўрмаган.
Инспектор “Рэндж Ровер” машинаси ускуналарининг кўчада ёниб ётганини кўрди. Тутаб ётган темирлар ёнидан

ўтиб, у бинонинг даҳлизига кирди. У лифт билан тепага кўтарилди ва ўлиб ётганларнинг устидан сакраб ўтиб хонага кирди. Унинг йигирма саккиз ёшли қорачадан келган ёрдамчиси Колетт Дюваль инспекторни меҳмонхонада кутиб олди. У ерда терговчиларнинг кичик, аммо профессионал гуруҳи иш олиб бораётган эди. Улар қотиллик содир бўлган жойни синчиклаб ўрганишарди.
— Биз бу ерда ўзимизни йўқотмай, дадил туриб иш қилишимизга тўғри келади, — деди Дюваль.
— Ҳозирча бизга нималар маълум? — сўради Годдар. У биринчи бор бундай ҳашаматли, саройга ўхшаш кошонани кўриб турибди. Лекин қотиллик содир бўлган жойда у имкон қадар ўзини вазмин тутишга ҳаракат қиларди.
— Сиз шефдан дастлабки маълумотларни олдингиз‑
ми? — сўради Дюваль.
— Ҳа.
— Унда бошлаймиз.
Ёрдамчи уни хонанинг ўртасида полда ётган ва атрофи мел билан чизилган, тўладан келган эркакнинг олдига бошлади.
— Раҳматли Рафик Рэмзи Сулаймон билан танишинг.
— Бу ўша Рэмзими? — сўради Годдар. — Миср мил‑
лионери шу бўладими?
— Минг афсуски, ҳа, — деди Дюваль. — Сиз у билан танишмисиз?
— Бир неча йил олдин у ва унинг хотини билан мен Гран-Прида танишганман, — жавоб қилди Годдар. — Ажойиб
инсон. Улар акаси билан Асвонда ёки Луксоренинг қаерида‑
дир қашшоқликда катта бўлишган, кейин фиръавнлардан ҳам бойиб кетишди. Аввалига улар темир руда, олтин, фос‑
фат ва шунга ўхшаш қазилмаларни қайта ишлаш билан машғул бўлдилар. Акасининг вафотидан сўнг Рэмзи асо‑
сан Нил дельтасининг табиий газ конида хизмат қилди ва шундай бойликка эга бўлди. Умуман олганда, Рэмзи

ниҳоятда дилкаш инсон бўлган: у самимий, хушмуомала ва содда эди. Унинг хотинига келсак...
Овозини пасайтириб, Годдар сўради:
— У шу ердами?
Дюваль йўқ дегандай бош чайқади.
— Унчалик эмас.
— “Унчалик эмас” нима дегани?
— Уни Парижда икки ҳафта олдин ўғирлаб кетишибди.
— А-а, — деди Годдар ўзини гуноҳкор деб ҳисоблаб.
— Бу ҳали ҳаммаси эмас, — деди Дюваль.
— Яна нима?
— Рэмзининг биринчи никоҳидан бўлган яккаю-ягона қизи – айнан онаси ғойиб бўлган куни ўлдирилган.
Годдарнинг пешонаси тиришди. Бу нимаси? Ота ўлди‑
рилган. Қиз ўлдирилган. Хотин ўғирланган. Бу бахтсиз оила қандай балога йўлиққан? Уларни ким шунчалик қарғаган?
— У неча ёшда эди?
— Қирқ икки ёшда.
— Йўқ, хотини эмас, — деди Годдар. — Қизи неча ёшда бўлган?
— Кечирасиз, — деди Дюваль ва ёзув лафтарчасига қаради. — Бригитта ўн икки ёшда бўлган.
Таъсирланган Годдар бош чайқади. Ўзининг қизи эндигина ўн ёшга тўлади.
— Гумон қилинганлар борми? — сўради у. Хаёлан шун‑
дай қотилликка қўл урганларни албатта топиб, уларни жиноий жавобгарликка тортишга у аҳд қилди.
— Ҳозирча йўқ, — жавоб қилди Дюваль.
— Гувоҳлар-чи?
— Эҳтимол, биттаси бордир.
— Ким?
— Қандайдир Марван Аккад деган одам, — деди Дюваль.
— Уни қидириб топинглар, — буйруқ берди Годдар. —Дарҳол менинг ҳузуримга олиб келинглар.